Wye Wêreld

Zambië 2018

‘n Groep van 13 Dee-Effers en 2 oud-Dee-Effers, onder leiding van mej. C. Wepener, onderneem weer vanjaar die opwindende uittog na Zambië vir die Zambië-gemeenskapsavontuur 2018.

Die groep besoek die gemeenskapsopleidingssentrum van Foundation for Cross-Cultural Education in die Masaiti distrik in die Copper-belt area van Zambië. Besoek gerus www.fce.org.za vir meer inligting. Hier ondersteun die groep die aktiwiteite van FCE op vele praktiese maniere. ‘n Hoogtepunt is ‘n besoek en oorslaap in die omliggende dorpies en skakeling met FCE se skool se leerders - in die skool en by hulle huise. Dit gee vir die groep ‘n unieke perspektief op die leefwereld van die kinders van daardie omgewing en dien altyd as ‘n geleentheid vir refleksie op die Dee-Effers se kultuur en alledaagse bestaan. Op die terugtog doen die groep by die asemrowende Victoria-waterval aan en span op die oewer van die Zambezi-rivier uit vir twee aande.

Foto:

Agter (v.l.n.r): Kara Engelke, Dian Schoeman, Barry Vorster, Kaleb Ackerman, Christo Kruger, Julia Roelofse en me. Celesté Wepener.

Voor (v.l.n.r.): Gina-May Venter, Anzel Pauw, Shae Barnes, Liza Hugo, Laura Beaumont en Ria Hiemstra.

Afwesig: Meeke Henn, Alexander du Plessis en Michiel Bester.

Zambië gemeenskapsavontuur

Jaarliks onderneem ‘n groep leerders en onderwysers van DF die avontuur van ‘n leeftyd. Dit is ‘n geleentheid wat nie net fisiese avontuur behels nie, maar ook delf in die diepte van die doel van die lewe en ons elkeen se plek en roeping in die kontinent waarin ons leef.

Hoërskool DF Malan: ‘n Gemeenskapskool wat ‘n wêreldse verskil wil maak. Hierdie is nie slegs ‘n visie van die skool nie, maar is in aksie te sien in die jaarlikse Zambië-gemeenskapsavontuur.

Die Dee-Effers besoek Foundation for Cross Cultural Education se opleidingsentrum in die Masaiti-distrik van die Copper-gordel in Zambië. Die opleidingsentrum se naam is Koti Ni Eden, wat in die plaaslike dialek “net soos Eden” beteken. Hierdie naam is voorwaar gepas – die omgewing is asemrowend mooi. FCE werk al vir dekades in die omgewing saam met die plaaslike mense om ‘n geleentheid te bied vir die ontwikkeling van die gemeenskap op verskeie terreine. Belangstellendes kan die webtuiste by www.fce.org.za besoek vir meer inligting. FCE bestuur ‘n proefplaas, ‘n mieliebank, ‘n skool, ‘n onderwysopleidingsuniversiteit, ‘n houtwerkfabriek en allerlei ander inisiatiewe op die gronde. Studente en personeel, wat almal vrywillig en sonder salaris werk, eet daagliks saam in ‘n gemeenskaplike eetarea. Hulle is van verskeie kulture van regoor die wêreld, insluitende Afrika, Europa, Australië, Noord-Amerika en Asië. Die Dee-Effers word tydens hulle besoek ingesluit by hierdie gemeenskap en dit het waarlik ‘n transformerende effek.

Gedurende die besoek van die groep, help hulle met fisiese werk in die verskillende departemente van FCE. Daar word ook tyd spandeer aan gemeenskapswerk in die omliggende dorpies, kinderontwikkelings-inisiatiewe, kuier met FCE se personeel en studente en ‘n geleentheid om vir ‘n paar nagte oor te slaap in ‘n dorpie naby die opleidingsentrum. In die “village” kry die Dee-Effers ‘n blik op ‘n ander manier van leef en ondersteun die mense wat in die dorpies bly se inisiatiewe deur hand by te sit. DF Malan het deur die jare ‘n besondere band met FCE en die mense in die dorpies rondom die opleidingsentrum gebou.

Gedurende die terugtog, besoek die groep die Victoria-watervalle. As een van die sewe wonders van die natuurlike wêreld, is hierdie ‘n besienswaardigheid wat eenvoudig beleef moet word. Dit gee ook vir Dee- Effers die geleentheid om te reflekteer op die mooi van die kontinent waarin ons leef.